【Now財經台】聯儲局官員最近不斷派定心丸，力撐經濟無事，美股三大指數過去一星期表現都平穩，而家市況係咪真係咁樂觀？大行仍然鼓勵買貨，仲話要「Buy In May」，應該信邊個？
「股市漁夫」創辦人莊志雄指，通脹未受控制，所以即使停止加息，高利率仍然會維持一段時間，換言之美股股價會低迷，反映長期估值嘅周期調整線，由37倍跌至29倍。佢提到，2008年3月投行貝爾斯登爆煲後，股市都有反彈，當時又係有班聯儲局官員派定心丸，指經濟只係溫和衰退，同而家矽谷銀行爆煲後嘅情況類似，認為之所以未大跌市，係因為大戶未派晒貨，當時美股指數都頂住近半年先有雷曼事件。而2007年高位美股嘅估值係27倍，息口同而家差唔多水平，到減至接近零息，估值都要跌至15倍先見底。
Lewis又話市場進入熊市第二期，指數波幅會大。據最近美銀基金經理調查，投資者買緊防守性嘅板塊，包括必需消費品(Consumer Staples)、公用股及醫療保健股，不過呢啲喺2008年最終都要大跌，今次仲要係有通脹嘅熊市，買美債都未必穩陣。據美銀數據，私人客戶不斷增加現金水平，可能揸現金真係最可取。
