文章分享

「股市漁夫」創辦人莊志雄指，好多美國企業嘅成績表都遠好過預期，比率近90%，上一次有咁好成績已經係2010年，但要留意一點，就係2010年後，績優企業都有啲無以為繼，因為好過預期嘅比率已經好高，要再進一步係有難度，股市喺經濟復甦嗰一下之後，就要唞唞氣，當日美股跌到好殘，但經濟就重新起步。

Lewis又話，如果睇標指企業真係交足貨，但最有趣之處就係業績靚，但股價唔識升，如果睇返過去一星期出咗業績嘅科技巨企，雖然唔係間間跌，Facebook 、Alphabet都有得升，但部分就跑輸標指，其實高增長股喺2月已經見頂，雖然依家標指仲撐得住，但今次業績公布後，見到績優股都要跌，佢認為有兩個「解釋」...

「股市漁夫」創辦人莊志雄指，由於Facebook、Alphabet、微軟創新高，帶動標指破頂，雖然納指冇創新高，但今年以嚟仲係有升幅，不過，由於之前好多炒得好顛嘅股份，尤其未有盈利嗰啲，其實呢類股票已經屬於「泡沫爆破」，例如「契媽股」。佢又話，其實少咗股份參與今輪升市，亦睇到市寬係背馳，標指係向上，因為大市值股造好，但整體大市係愈來愈多股份跌穿50天線，剩返約一半股份喺50天線樓上。

Lewis估計，市寬會喺現水平上落，強勢股會hold得好啲，但弱勢股彈完之後應該冇力再升，市寬要上返高位亦比較難，因為有好多蟹貨，相信第二季都會係呢個狀態，即指數可能再創新高，但之前炒得最顛嘅股份，最叻都只係打橫行。