【名家給力場】陳建良:長和系揀港燈、長建 【Now財經台】長和系已陸續派發成績表，其中，長和 (00001) 及長實集團 (01113)昨日(15日)公布業績後，股價今日(16日)向下，雖然市場對中期息減少有啲失望，但未至於感到意外，面對現時嘅經濟環境等因素，未來息率又點睇？有興趣入手長和系嘅投資者又應該點揀？ 勝利瑞柏基金管理合伙人暨投資總監陳建良指，集團指派息係因應業務重估而定，長和及長實業務平穩，但仍面對頗大挑戰，股價折讓咗唔少，希望公司可以定期派息，但認為派息喺全球經濟放緩下，仍有機會再減少，不過，喺現時嘅經濟環境下，長實及長和營運已經做得非常好，只係市場任由股價繼續折讓，所以會對派息失望。 揀股方面，KL就話，長和系之中可以考慮入手港燈 (02638) ，其次係長江基建集團(01038)，值得留意係，長建下星期會喺英國第2上市，有助提升成交量及減少折讓，收購及集資渠道亦會增加，都對股價有利。佢又認為，長建現時估值偏低，但相信市場會給予長建更合理嘅價值。 【名家給力場】陳建良:長和系揀港燈、長建
【Now財經台】中央擬再出招撐港股，《彭博》喺港股昨日(9日)收市後報道，指內地考慮減免內地投資者炒港股嘅股息稅，瑞銀及中金清楚列出現行嘅股息稅政策，內地投資者最多會被徵收28%股息稅。雖然消息仍未證實，但港股今日(10日)表現興奮，恒生指數一度飆逾450點，逼近19000關，港交所(00388)股價更一度衝高8%，一旦落實推出，利好作用真係咁大？ 勝利瑞柏基金管理合伙人暨投資總監陳建良指，其實只有內地個人投資者及證券投資資金，透過港股通投資嘅紅籌股及非H股嘅中資股，先會雙重徵稅，H股就完全冇關，所以真正受惠主要係投資高息紅籌股嘅內地個人投資者，股份就包括中國移動(00941)、上海實業控股(00363)及中國建築興業(00830)，科技股就差少少。 KL又話，喺現時資金輪動，冇特定趨勢下，如果想入市或追貨，就建議追落後股，因為緩衝空間大啲，不過，大落後嘅板塊就比較危險，例如內房及電動車板塊。 【名家給力場】炒高息紅籌散戶成減免股息稅大贏家？ https://youtu.be/JzwUaJq59Uo?si=2wK26TRhrgkQIt1Z
