【Now財經台】農曆新年假期多咗人去澳門、入賭場玩兩手，由舊年10月底低位至今，幾隻主要賭股普遍倍升，但銀河娛樂(00027)股價表現相對差，賭收方面其實有幾大改善？賭收由不同部分組成，其中VIP應冇法回復至疫前水平，靠中場、高端中場及非博彩收益，可唔可以彌補到VIP流失嘅收益？ 勝利瑞柏基金管理合伙人暨投資總監陳建良指，睇返訪澳旅客數字，今個農曆新年假期訪澳旅客中，香港旅客復甦情況最理想，大約恢復到2019年約70%，來自其他地區嘅旅客恢復到約30%。至於賭收方面，中場恢復至2019年近50%，VIP就回復至20%以上，銀娛股價表現相對差，同賭收組成有關，市場認為中場係賭收支柱，即使VIP復常，估計都去唔返2019年一半，VIP客唔係冇，只係注碼細咗好多。 KL認為，炒賭股要留意復常後，賭收會唔會增加，訪澳旅客人數反而冇咁重要。 【名家給力場】澳門「旺丁」帶挈唔到賭股
【Now財經台】過去1個月，睇返唔同ETF類別嘅表現，上月以新興市場ETF表現較好，一路炒美元回軟及中國經濟重啟，日圓ETF只係排第2位，點睇嚟緊嘅走勢？未來係咪繼續炒中國重啟因素？ 「股市漁夫」創辦人莊志雄指，投資者好多時留意今日發生嘅事，但始終要睇返個趨勢，其實由舊年第4季開始，主題係熊市反彈，特色係之前強勢嘅美元回一回，令好多股市指數造返好啲，以龍頭美股為例，雖然過去1個月累升3%至4%，但有一點要留意，睇返標指嘅走勢，舊年6月係插咗落去，之後一直處於上上落落嘅狀態，仲未擺脫下降軌，其實係類似熊2狀態，即係跌咗近20%後，造返一個反彈，但又破唔到頂，跟住又呈一個上落格局，龍頭已經係咁，其他市場都可能畀龍頭牽著，最重要龍頭唔好出事。 Lewis又話，日本市場係今年最少人談論嘅風險因素，日本央行今日出咗聲明後，日圓應聲下跌，行長黑田東彥就快卸任，維持政策不變係正常，但令佢聯想到當年美國聯儲局狂做寬鬆政策，令美國經濟表現似乎好好，但2008年就出現雷曼倒閉事件，因之前過度印銀紙，印出一個樓市泡沫，最後要靠QE收科，依家日本嘅情況有啲類似。【名家給力場】日本市場風險不容忽視 ：https://youtu.be/nnMFAjX4qUI
