【Now財經台】美股3大指數噚晚終於要跌，雖然之前升咗咁多日，但睇返各類資產喺聯儲局議息後嘅表現，債券明顯跑贏，應該點解讀呢個現象？
「股市漁夫」創辦人莊志雄指，聯儲局加息加得太慢，市場認爲係一個錯誤，因爲聯儲局龜速「收水」，會導致明年第1、第2季需要提早，甚至加快加息，市場依家似乎係驚緊呢樣嘢。若加息步伐加快會影響美國經濟，所以美債係議息後突然升得勁過股市，例如長債ETF，如果市場驚通脹，長債ETF應該會跌，但依家不跌反升，呢幾日大幅跑贏標指。
Lewis又話，另一個技術性因素可能係之前太多人睇淡長債，個個驚通脹就沽空債券，出現挾淡倉嘅情況，依家債券、黃金呢啲避險資產跑贏股市，但其實股市唔係冇亮點，投資者不妨再觀望一下。
【名家給力場】美議息後債券跑贏因爲…（上）:
【Now財經台】美國聯儲局主席鮑威爾噚晚話，唔會因憂慮通脹而先發制人加息。過去一個星期，有40%標指股份跌至1個月新低，聯儲局仲未正式「收水」，美股動力已經減弱？ 「股市漁夫」創辦人莊志雄指，幾個主要指數唔算弱，仲可以稍微破頂，不過都係靠大股托住指數上，整體大市都係反覆上落，唔見有好突出嘅表現。佢估計，聯儲局稍後可能會減少，甚至停止買債，投資者一定要小心，睇返過往聯儲局停止買債後，股市通常會出現大上大落嘅情況。Lewis預期，未來呢1、2個月仍然安全，但去到8、9月，即傳統上美股表現較差嘅月份就要小心。
