「股市漁夫」創辦人莊志雄指，日本央行冇管理好市場預期，所以觸發拆倉潮，唔單止影響日股，仲影響埋美股，連最強嘅納指由7月中開始跟隨日圓見頂回落，日圓跌代表美元轉弱、日圓轉強。日央行出嚟安撫市場，表示市場未穩定嘅情況下，係唔會再加息。依家市場穩定返，會唔會加息，現時對日央行嚟講仍然係一個難處，因為仲未解決通脹問題。

 

Lewis相信，短線做高槓桿或套息交易(Carry Trade)嘅投資者已經拆晒倉，但留意返長倉，唔少投資者以借日圓嘅方式買日本資產，長倉好多已長揸幾年，利潤非常可觀，如果日圓轉強，會影響日股，所以投資者沽部分日圓資產，還日圓，日圓可能會繼續強勢。若日圓跌到落140水平，可能會拆埋長倉，睇住日圓走勢係一個重要指標，下一輪好大機會會影響美股。

 

 

「股市漁夫」創辦人莊志雄指，市場已經就短期減息預期計價，問題在於唔知減0.25厘還是0.5厘，早前，《彭博》報道指，如果睇利率期貨聯儲局會減9次息，每次0.25厘，其實睇美匯指數都可以睇到市場嘅取態，但依家市場認為要合共減超過2厘息，問題係減息期間係咪循序漸進，即每次減0.25厘，合共減9次，如果依家要減2厘以上，就代表美國經濟陷入衰退，如果冇出現衰退，其實唔需要減2厘以上，如果經濟係「軟著陸」應該減1厘以下。

 

Lewis又指，依家嘅變數係當聯儲局真係慢慢減息，通脹係咪會回升，因為通脹仍未完全受控，今次係因為聯儲局之前做錯嘢引發通脹，通脹開始之後，通脹預期亦升咗好多，呢個諗法唔係咁易改變，聯儲局需要加息加得好狠，先可以完全遏制通脹，但如果9月啟動減息周期，就應該遏唔晒，將會死灰復燃，持續減息就會令通脹回升，到時聯儲局就會面臨困局。

 

 

「股市漁夫」創辦人莊志雄指，都可以咁講，最大觸發點係日央行加息多過市場預期，因為之前累積大量利差交易(Carry Trade)，又冇人知道有幾多，不過，德意志銀行(Deutsche Bank)估計有20萬億美元，咁只能聽大行講，因為冇準確嘅統計或指標，可以知道真正有幾多Carry Trade存在。

 

Lewis又指，有部分槓桿真係好勁，但如無意外都應該「死晒」，睇返日圓長短倉分布，如果去到零就代表長短倉都冇，但呢個係高盛嘅統計，如果由負數轉正數，就代表做日圓短倉嘅人幾乎全部被「夾死晒」，如果純粹係「偷雞」用槓桿做，呢類嘅Carry Trade如無意外都「死晒」。