「股市漁夫」創辦人莊志雄指，暫時未見到指數有咩問題，如果投資者揸住一直破頂嘅「萬億股王」，可以繼續持有，但就要留意其他持貨，因為美股頭50隻市值最大股票，今年第2季後波幅突然擴大，而且係歷年來最大，波幅擴大容易導致股價急挫，事實上，有部分股份已開始受影響。

Lewis又話，雖然指數靠「股王」破頂，但市寬就向下，紐約交易所中線市寬更跌穿50強弱分界，出現市寬同指數背馳嘅情況，踏入6月市寬甚至未有回升，情況係非常罕見，而納指情況更差，所以投資者要留意，如果手上持股已跌穿50天線，建議要先行離場。

莊志雄又指，喺極端背馳嘅情況下，除非市寬回升，否則，指數會被拖低，現時市寬係反映美國經濟現況，高盛經濟驚喜指數已跌至今年低位，反映近期美國經濟數據差過預期，要留意對股市嘅影響。

【名家給力場】美股有貨跌穿呢個位要離場

「股市漁夫」創辦人莊志雄指，依家美股最強板塊係公用股，第2季至今公用股交易所買賣基金(ETF)累升11%，大幅跑贏標指，必需消費品ETF亦升得靚過標指，而呢兩個防守性板塊係升得最好。

Lewis續指，電力公司Vistra Energy(VST)及Constellation Energy Corporation(CEG)係最強公用股，不過，估值已經太貴，因為揸美債最少收4至5厘息，造定期更有5厘以上，反觀VST及CEG股息率唔夠1厘，純粹炒核電概念。佢又指，如果投資者想炒核電概念，不如直接買核電相關股，例如Global X鈾ETF(URA)，都值得留意。

【名家給力場】核電概念公用股太貴兼息少 不如買...