【Now財經台】美國上月通脹進一步升溫，市場擔心通脹高企唔係暫時性。近日，房地產信託基金(REIT) ETF跑贏羅素2000、標普ETF，不過，過去幾個交易日都有資金流出房託ETF，而第2多基金經理增持嘅科技股，納指破頂股數目持續減少，只剩返少數科網巨無霸推高納指。 「股市漁夫」創辦人莊志雄認為，其實基金經理應該喺5月追入REIT、科技股，依家先大手增持其實有啲遲。Lewis又話，納指一路升，但破頂股數目一路縮，呢個情況係唔可以持續，因為要推高指數，係需要好多股票參與，如果單靠龍頭股，指數好難一直升上去。佢又話，依家BAT稍為回落，估值去返合理水平，再推高FAAMG，遲啲美國都可能出現反壟斷風暴，到時可能借消息回調。
【Now財經台】美國聯儲局主席鮑威爾噚晚話，唔會因憂慮通脹而先發制人加息。過去一個星期，有40%標指股份跌至1個月新低，聯儲局仲未正式「收水」，美股動力已經減弱？ 「股市漁夫」創辦人莊志雄指，幾個主要指數唔算弱，仲可以稍微破頂，不過都係靠大股托住指數上，整體大市都係反覆上落，唔見有好突出嘅表現。佢估計，聯儲局稍後可能會減少，甚至停止買債，投資者一定要小心，睇返過往聯儲局停止買債後，股市通常會出現大上大落嘅情況。Lewis預期，未來呢1、2個月仍然安全，但去到8、9月，即傳統上美股表現較差嘅月份就要小心。
【Now財經台】雖然比特幣(Bitcoin)最近又「價崩」，但反而有機構投資者大舉掃貨，Bitcoin最大持有者之一MircroStrategy宣布，發垃圾債掃Bitcoin，其實呢個消息早兩日已經出咗，但完全幫唔到Bitcoin，個價彈都冇彈過。 「股市漁夫」創辦人莊志雄指，MircroStrategy嘅CEO係Bitcoin教主級人馬，一直都唱好Bitcoin，用公司加倉，因為佢係教主級人馬，所以好多散戶都睇住佢個Twitter去買Bitcoin，甚至買佢間公司嘅股票，但依家已經變咗蟹貨，公司再發債去買多啲Bitcoin，聽聞已經將個平均價溝到2萬幾至3萬幾美元，如果Bitcoin再跌多20%至30%，除投資Bitcoin嗰啲富豪級人物，可能會面對財務危機外，MircroStrategy本身亦可能會「出事」，繼而引爆一個連鎖反應。
Lewis又話，高盛自己做咗一個風險胃納指標，過往見到虛擬貨幣表現差，整體市場嘅風險胃納表現都係會轉弱。 https://finance.now.com/news/post.php?id=662062 https://finance.now.com/news/post.php?id=662063【Now財經台】港股6月開局有得升，美股就仲企喺高位，到底港股及外圍近期嘅風險胃納係咪上升咗？
「股市漁夫」創辦人莊志雄指，過往虛擬貨幣喺風險胃納問題上，係有一啲啟示作用，又認為虛擬貨幣炒得最顛嘅市場。佢又話，最初Gamestop係帶領一啲生意好差，但淡倉好多嘅股票挾高，後來呢啲股票嘅泡沫爆破，之後就輪到「科幻股」，即係講未來嘅股票，例如「契媽股」，呢啲股份早喺2月已開始「窮」，其實係逐浸逐浸跌，跟住就跌到虛擬貨幣，即係最多散戶參與嘅市場逐個冧，最終係好有可能影響風險胃納，原因都冇咁多錢輸咁多轉。
