「請注意頁底重要聲明」
大家好！我係漁腩，睇到咁多位師兄師姐高汁文章，實在有點心痕想一試，諗唔到今日夢想成真，可以隔空同大家交流。
我同所有漁民一樣，都係一路由莊博既舊鋪睇到依家(好似同D人話我細細個睇你唱歌一樣xdxd)，可能因為咁，漁腩無學壞手勢亂咁做預測。 投資係審時度勢，不要堅持己見⋯⋯咁咪即係無主見啦⋯⋯是但啦，反正我係要贏錢，唔係鬥氣😜
先自我介紹，小弟30出頭，土生土長80後，畢業後任職本港銀行，從事客戶經理 (aka Sales) - 企業借貸(commercial lending)，有10年經驗。早年誤信名牌，考咗個CFA ，從此中咗efficient market hypothesis嘅毒🦠 ，以為所有資訊已經反映在價格上，毒發時荷包受盡煎熬🤬⋯⋯直至遇上莊博，先至搵到解藥！我嘅經驗係，証書攞得越多，荷包縮得越勁！近排眼見股民深受5號仔所重創 ，今日想簡單講一吓商業銀行係乜嘢嘅一回事。
傳統商業銀行
好多人話銀行股👀本book (balance sheet)⋯⋯Bull💩啦，根本無人睇得明，連CEO都唔清楚本book嘅構成，究竟event risks對balance sheet 有乜影響？仲未計counterparty risks 同default risks。喂喂喂， 又話買銀行股唔應該睇 P/E，依家book value 又信唔過⋯⋯咁睇乜Q嘢呀？根本就係要睇大環境，睇經濟週期，睇行業趨勢， 當然揀股嘅時候可以比較銀行盈利能力及質素。
商業貸款
經濟好，生意自然好，貸款咪多囉，銀行就會繼續放水，直至經濟轉差⋯⋯到時銀行又縮番轉頭， 唔願意再借，所以銀行股根本就係周期股。
由於銀行要比分析員睇佢本簿，如果貸款急降係一個收入指標，即係佢生息嘅資產跌咗，有部份銀行會喺年結前買銀團貸款增加asset on balance sheet或者叫客戶年結前提取貸款，頂住條數，如果大家要check佢有無做window dressing，可以👀 [總貸款 X 平均淨利息差] ⋯⋯計計條數 ，咁樣大家就可以知道銀行有無充大頭鬼。其實講咁多，即係話喺下行周期 ，銀行會千方百計window dress 佢 balance sheet，等各分析員寫報告都易寫D。咁多位漁民唔好輕信年結果幾粒balance sheet數字呀!
零售銀行貸款
近年樓宇買賣成交減少，樓按數目自然減少，僧多粥少之下，大型銀行主力搶生意做多啲樓宇，回贈優惠又鬼死咁高，其實樓按利錢都好薄，已經係雞肋。 不過，香港一般按揭只有5-8成 ，資不抵債風險比較低，所以仍然係各銀行嘅主戰場。
由於中小型銀行資金來自拆借市場，你想想身邊親戚朋友D錢擺邊，而吸引企業擺存款一定要比小戶存款高息，個別企業派息月份或有大型IPO，佢地頭寸唔夠，甚至要喺拆借市場攞錢，存款成本點會夠大型銀行平呀，而樓按偏偏係只睇價格嘅市場( i.e. H+1.6% / P-2.5% 低者為準)。要吸引人做樓按，你一定唔可以貴過人，大行就以價欺人，中小型銀行成本貴過人，咁中小型係咪惟有被逼退下火線⋯⋯而大銀行都只不過係薄利多銷。
存款業務
大銀行存款勁有優勢，好似你同我出糧戶口，炒股都會擺錢入去大貓銀行。所以銀行結餘跌時，中小型銀行搶嘅存款要比高息，當然佢地亦會想reprice D loans，但係你估咁易咩⋯⋯至於Yield curve flattening 嘅負面影響，呢個連隔離陳師奶都講嘅野，我就唔重複啦。
非利息收入及撥備
ELN，股票，外匯同保險收入⋯⋯市好，生意多D，市差收入咪跌囉⋯⋯又係有周期性。仲有一樣好重要嘅因素, 就係逾期壞帳(ECL)，簡單來講就係銀行自己覺得未來會輸幾多錢，呢部分會直接蠶食盈利。經濟差，樓市跌，要assume 多D壞賬，只不過有抵押品嘅可以計少D。漁民可能心諗，邊會有人估咁多㗎?! 梗係有，估多係為咗未來回撥，可以smooth out revenue，每年收幾億侍奉首富嘅打工皇帝正正係呢方面嘅高手🤑
所以銀行資產質素(asset-quality)，要👀借比咩公司，側重於那一個版塊，邊個地區，都息息相關。你見到唔同銀行P/B 有高低，主要反映喺呢度。
最後多謝莊博建立此平台，讓各高手交流，這裏真的臥虎藏龍！至於小弟，仍然係一舊漁腩⋯⋯不過做咗漁民之後，叫做可以靠投資搵到首期上車🙏🙏🙏
重要聲明：股市漁夫內的所有內容，包括本影片，絕不構成任何投資意見或購買任何股票及金融產品的特定推薦意見及/或不構成任何游說或要約，以購買、出售或以其他方式交易任何證券、期貨、期權或其他金融工具或其他產品，漁夫系統的內容亦並非就任何個別投資者的特定投資目標、財務狀況及個別需要而編製。投資者不應只按漁夫系統的內容進行投資。用戶必須留意，漁夫系統的所有訊號，並非是買賣訊號或任何投資建議，而所有訊號均是全自動用第三方提供之客觀市場數據計算出來的結果，當中並不涉及任何人為的想法、修改、修訂或任何投資建議。本網站包含的所有內容、資訊、訊號，並不針對任何特定的投資目標、財務狀況以及可能使用或接收該內容的特定人員的特定需求。在作出任何投資決定前，投資者應考慮各種金融產品的個別特點、個人的投資目標、可承受的風險程度及其他因素，並適當地尋求獨立的財務及專業意見。
