颱風過後嘅週末，風和日麗，令今年大半時間都係WFH嘅我，都覺得自己好似放緊暑假咁。 往年暑假嘅8月下旬，應該係本地大學O camp進行得如火如荼嘅時候。 可惜，今年大學新生除咗冇咗O camp外，連第一個學期都要Online上堂。對於進入大學展開人生新一頁嘅莘蒂學子嚟講，我戥佢哋感到美中不足。
Hi大家好！我係 #漁美人 😉 。
漁美人成長及學習於會考同A-Level嘅年代，可能同現代嘅DSE有啲出入，但我相信所有順利進入大學嘅學生，背後都有一定嘅辛酸史。當時為咗入大學，補習更加係在所難免。
講起補習，漁美人可以話係經驗豐富，由小學時期放學後，去半托兒半補習嘅補習社，至會考同A-Level嘅恆常或精讀班，當中仲加插了唔少嘅私人補習。後來讀大學，我順理成章地做最多大學生做嘅parttime – 補習老師。
總括我多年幫人補習及被補習經驗，我簡單總結到三類學生。第1: 名列前茅，勢要攞A型；第2: 中游分子，目標攞C型 ；第3:當補習係萬能丹，考天才波型 。
第1型學生： 名列前茅，勢要攞A型
以我一位舊同學為例，我見過佢上堂時，拎本䄂珍英漢字典喺櫃桶度睇，相信嗰堂嘅內容佢已聽過，所以佢用盡時間嚟背字典。（嗰本字典我都有，但我從來冇諗過可以咁用）。佢都有去補習社，但只讀精讀班，最重要目的係學習考試答題技巧及捕捉題目趨勢（喺主流學校，可能由於時間關係，老師唔會重點教考試技巧）。假如你奇怪，神聖嘅考試都有趨勢可以捕捉？你睇吓補習天王案就知。
第2型學生：中游分子，目標攞C 型
哪些年喺香港嘅公開考試中， 攞C已經係幾好嘅表現。會考如果全部拎C，就有18分（14分就保證升讀中六，而滿分係30分）；A-Level，如果科科拎C，基本上一定入到大學。#慳妹空姐 就係呢類人，佢喺有興趣嘅學科會認真啲，冇興趣嘅就間唔中發白日夢，扮吓聽書，然後寫吓歌詞畫吓書。到後來，我哋傾計時，佢先知道原來考試除咗要讀書外，學識答題技巧及捕捉題目趨勢都好重要。
第3型學生：當補習係萬能丹，考天才波型
佢哋嘅共通點係經常投訴老師好悶，令佢哋上堂冇心機或聽唔明，所以佢哋成績唔好老師要負好大責任。以我一位補習學生為例，佢喺學校多數時間瞓覺，去補習社拎咗notes後，到我幫佢補習時要我教佢notes內容。我奇怪，補習社唔係教咗啦咩，點解又要我教多次？佢嘅理由係：放學仲要補習好攰，冇心機聽。 咁學校老師呢？ 佢嬲嬲豬話😡：好悶！我都唔明佢講乜，所以先補習之嘛。
人人補習嘅目的都係想考試成績好，繼而入大學。但只係自我感覺良好地認為自己出錢出力，喺課餘時間仲俾錢補習，因此，成績就可以同第1第2型嘅考生比較，我覺得有啲自欺欺人。你嘅對手，唔止係考試制度，仲有以上第1第2型嘅考生，甚至仲有1.1 ，1.2，2.1，2.2型考生。
我哋依家過緊嘅生活，喺由學生時代一直延伸而來。雖然我哋已經唔使再考試，但日常生活所有事都係一門學問。台上一分鐘，台下十年功。我喺安全感的訓練(中)
http://bit.ly/smm11_1 引用過佛羅里達州立大學心理學教授Anders Ericsson研究，佢認為擁有天賦才能嘅人要以十年計嘅時間先可以成為一位頂尖嘅表演者，因此，喺贏別人贏自己前，下苦工學習係在所難免。考試如是，投資如是，做人如是。
Thank you and have a good weekend Fishers. XX
圖片來源：網上圖片
重要聲明：股市漁夫內的所有內容，包括本影片，絕不構成任何投資意見或購買任何股票及金融產品的特定推薦意見及/或不構成任何游說或要約，以購買、出售或以其他方式交易任何證券、期貨、期權或其他金融工具或其他產品，漁夫系統的內容亦並非就任何個別投資者的特定投資目標、財務狀況及個別需要而編製。投資者不應只按漁夫系統的內容進行投資。用戶必須留意，漁夫系統的所有訊號，並非是買賣訊號或任何投資建議，而所有訊號均是全自動用第三方提供之客觀市場數據計算出來的結果，當中並不涉及任何人為的想法、修改、修訂或任何投資建議。本網站包含的所有內容、資訊、訊號，並不針對任何特定的投資目標、財務狀況以及可能使用或接收該內容的特定人員的特定需求。在作出任何投資決定前，投資者應考慮各種金融產品的個別特點、個人的投資目標、可承受的風險程度及其他因素，並適當地尋求獨立的財務及專業意見。
詳情請重溫股市漁夫FAQ及免責聲明。
最後更新： 2020-08-22
