大家好，今次係小弟漁網第一次寫文章，分享吓做交易決策嘅心路歷程，請大家多多指教。首先好多謝博士俾個機會我寫下嘢，同都好感恩，可以喺漁夫群組度同有經驗嘅師兄師姊一齊學習。
小弟大約係歐債危機嘅時候開始聽博士嘅分析，大大話話都已經八九年了，當然依家嘅系統冇得同以前嘅相比，我都好坦白咁同大家講，自己一向嘅成績都麻麻，可能唔夠天份，亦都改不了自己嘅壞習慣，經常10上10落嘅打法，令自己進退失據，曾經亦用槓桿輸過大錢。所以當博士離開舊舖嘅時候，發覺冇咗一個好嘅分析，賺唔到錢，就停咗一排。
直到喺舊年年頭嘅時候，處理好自己屋企嘅事，知道博士出山，就參加漁夫系統。嚟到之後，先至發覺，原來係股市上面贏錢，唔係一定需要好準確咁知道短期嘅方向，最緊要嘅反而係資產配置，即係我哋嘅Plan ABCDE。咁當然對於我自己來講，梗係冇咁快明晒啦，開頭果幾個月都係喺度炒上炒落，成績都依然麻麻。
去到舊年年中，開始發現金價有見底嘅跡象，同時博士亦都經常提及黃金，於是就開始推翻自己之前用嘅一套唔得嘅方法，積極咁樣建立A B C D E。結果去到而家，金價，美債，Plan C 工具做得好好，自己跟博士PlanD工具都好， 唯一美中不足嘅係，未改得晒自己壞習慣，亂做淡倉，影響Plan D嘅整體回報，不過有keep住 2:1 好淡比例，同埋主要係用期權做，整體Plan D都有錢贏。如果好似以前咁，以為自己會睇啱個市嘅未來方向，喺今年咁波動嘅情況，真係九死一生！所以我永遠都記住，博士講過唔好亂咁做淡，亦都未見過有錢嘅人係完全冇貨喺手⋯⋯希望好快就戒甩這個壞習慣。
講返最近嘅操作，記得10月上旬嘅時候，博士不只一次提醒要留意A股市場，話中港市場可能第四季會跑贏，要加大Plan E中國市場比重。睇返Plan E，除咗風中勁草，仲有A股 ETF，於是自己除咗揸咗風中勁草入邊嘅強勢股， 為咗減低自己揀錯股票嘅風險，就用咗期權去博A股ETF，2822及3188。不過要留意，就算睇好都唔代表可以過度槓桿。由於本身自己都持有少量納指Put，及VIX Call，見到A股強勢，能量長期維持平均三格以上，咁10月就進取少少用Bull Spread 去博。
睇返兩隻A股 ETF 2822同3188 ， 2822係強少少，10月12日有一支大陽燭升上，風險管理就用嗰日嘅最低位做stop，於是10月14號就入咗第一注11月嘅2822 及3188 call。再喺21及23號於接近高位（因為驚唔夠貨），再買咗一注細嘅12月call。跟住27號裂口大跌，帳面上由盈轉虧，幸好收市守到10月12日嘅底位，當日收市前，再買多一注11同12月嘅call。同樣嘅事情發生係10月30號，A股 ETF回落，但收市價在10月14日在低位之上。由於自己之前有D風中勁草食咗糊，手頭上多咗現金，於是就攞利潤嘅一部份再買入11月同12月嘅call。
博士講過，用以小博大嘅方法，最好係用beta系數大於1.0嘅股票，其實呢兩隻ETF，爆發力係唔夠嘅。所以，用bull spread 可以減低成本，補償返爆發力不足嘅問題。睇返呢兩隻ETF，喺30號之後就冇再創低位，反而穩步上升，直到11月5號才爆升！我自己就唔貪心啦，用接近開倉成本沽出高一格的call，製造接近負值Bull Spread，咁樣就可以睇多陣，一來可以食到未完嘅升浪，二來自己又冇咁擔心，因為已經接近零成本。只係留返一兩張單頭嘅12月call，以防之後再爆升。
記得自己上次大選嘅時候，就係因為10上10落嘅打法令到自己進退失據，當市場開始priced-in 侵侵當選嘅時候股市跌得好勁，之後好快上返仲係咁升。果次當然冇錢贏啦，但係反而今次，用Plan A B C D E嘅方法，就算開邊一邊，都可以有正回報。
重要聲明：股市漁夫內的所有內容，包括本影片，絕不構成任何投資意見或購買任何股票及金融產品的特定推薦意見及/或不構成任何游說或要約，以購買、出售或以其他方式交易任何證券、期貨、期權或其他金融工具或其他產品，漁夫系統的內容亦並非就任何個別投資者的特定投資目標、財務狀況及個別需要而編製。投資者不應只按漁夫系統的內容進行投資。用戶必須留意，漁夫系統的所有訊號，並非是買賣訊號或任何投資建議，而所有訊號均是全自動用第三方提供之客觀市場數據計算出來的結果，當中並不涉及任何人為的想法、修改、修訂或任何投資建議。本網站包含的所有內容、資訊、訊號，並不針對任何特定的投資目標、財務狀況以及可能使用或接收該內容的特定人員的特定需求。在作出任何投資決定前，投資者應考慮各種金融產品的個別特點、個人的投資目標、可承受的風險程度及其他因素，並適當地尋求獨立的財務及專業意見。
詳情請重溫股市漁夫FAQ及免責聲明。
最後更新： 2020-11-09
