「請注意頁底重要聲明」
大家好，我係漁得水，好耐冇同大家見面。
首先祝大家虎年身體健康、投資有道，虎進金來，越撈越有！
最近網上平台有句熱話「炒勞好過炒股」，唔知大家有冇聽過？話說這股炒錶熱潮由上年12月11日Phillips紐約拍賣會以5,000萬港元拍出了一隻 Patek Philippe Nautilus 5711/1A x Tiffany限量版掀起。也因為PP5711錶盤顏色為Tiffany Blue，間接帶動了ROLEX勞力士2020年推出的Oyster Perpetual（OP）的彩色盤系列，當中Tiffany Blue漆面，由定價4萬多，炒至6萬，其後更瘋狂炒到上20多萬，溢價率達到500%！
有人話香港人有錢冇掟洗？究竟手錶界呢三個月發生乜事，令到啲人瘋狂入市？我以親身經驗告訴大家，確實炒到飛天! 因為小妹1月中食炒價買入的綠水鬼126610LV,買入不到一週已經升了近3萬, 最近炒價更高達22萬。
事緣Rolex勞力士 1月1全球價格調整，不少人想趁加價前買到平貨，奈何因為疫情關係供貨量一直有限，長期求過於供的情況下，運動型手錶成為水貨客的炒賣對象。AD ( Authorized Dealer) 長期缺貨，大家唯有轉投水貨店，食炒價，再上疫情令外出旅遊受阻，令二手市場變成一門有利可圖的生意。話說我1月頭無意中發現2019年買入的Rolex yacht master 40mm朱古力面已停產，新一代炒價約18萬，當時我大吃一驚，心諗我買入價才10.8萬，戴了三年，如果還能賺6-7萬, 未好正？世間上竟然有戴住贏咁荀嘅嘢？於是我上二手平台問價，有人開14.5萬, 但我見一個月前有15.8萬成交紀錄，於是我決定自己登post私人出售。想不到我出了一個17萬的post，一天內inbox 我的人已超過10個，我開始懷疑自己開錯價，而且買家還願意先付$1000訂，以防海鮮價，加上我上行交收沒多收$1000，所以有興趣買的人特別多。當時我心諗，新型號全新先賣18萬, 我平1萬放都好正常吧。當然我覺得炒到咁火，主要原因是大多數人認為買錶、買手袋可以保值及抗通脹，但我個人認為有少少over左，因為連落後款Airking、 Milgauss都傳停產，炒到上10萬以上，頓時有個感覺係連嘉湖山莊都炒到破頂！問你驚未？！
破頂
講起破頂，講番股市先，所謂破頂，是指股價突破了高位(52週高位/歷史高位) 。琴日中國建築(3311HK)又反覆上返$10，今日更破頂，衝破前高位$10.16，收10.38。突然令我諗起2022年 seminar，金sir講過一句說話：「價值股帶來升幅、增長股帶來波幅、外圍帶來跌幅」，好似已經逐步展現。大家如果想重溫或了解更多，可以click 入以下2022年網上研討會連結:https://insight.stockfisher.com.hk/replay2022video
假突破
所謂假突破是股票在某一關鍵點上出現了轉勢突破，但這種突破不具備持續性，突破之後股價未見穩定，反而隨市場的趨勢急轉直下，引發了套牢盤，展開了持續性的調整。大家記唔記得上年10月尾，當Tesla 炒到上$1208，比亞迪(1211HK)跟勢炒上，高位升至$324，當時出現過類似VCP pattern, 不過當時漁夫會員影片提及過，有機會係假突破，因為股價升，未有帶量。
一般來說，「向上突破」有幾個變化：
1. 突破，必有量
2. 回測，量就縮
3. 阻力會變支撐，並且應站穩支撐價位
重要聲明：股市漁夫內的所有內容，包括本影片，絕不構成任何投資意見或購買任何股票及金融產品的特定推薦意見及/或不構成任何游說或要約，以購買、出售或以其他方式交易任何證券、期貨、期權或其他金融工具或其他產品，漁夫系統的內容亦並非就任何個別投資者的特定投資目標、財務狀況及個別需要而編製。投資者不應只按漁夫系統的內容進行投資。用戶必須留意，漁夫系統的所有訊號，並非是買賣訊號或任何投資建議，而所有訊號均是全自動用第三方提供之客觀市場數據計算出來的結果，當中並不涉及任何人為的想法、修改、修訂或任何投資建議。本網站包含的所有內容、資訊、訊號，並不針對任何特定的投資目標、財務狀況以及可能使用或接收該內容的特定人員的特定需求。在作出任何投資決定前，投資者應考慮各種金融產品的個別特點、個人的投資目標、可承受的風險程度及其他因素，並適當地尋求獨立的財務及專業意見。
