文章分享

勝利瑞柏基金管理合伙人暨投資總監陳建良相信，今輪升浪同去年嗰浸升浪唔同，今次唔係一個流動性風險(Liquidity Driven)嘅升浪，今次係市場擔心係咪有部分中資科技股及消費股嘅Fundamental真係變好，投資者介乎信同唔信之間。不過，由今年1月到依家，恒指未有一日係升得特別多，依家係技術性牛市，投資者唔使太心急去追。 

KL又指，可以等港股回一回氣之後，再留意市況如何，因為市場都追求增長，唔能夠一味靠平，同埋靠啲錢衝入嚟，依家大家開始覺得中國喺人工智能(AI) 方面有優勢，因此，市場會投資返非國企嘅私人企業，令A股及港股市況好轉，不過，指數未必會反映相關情況。 

【名家給力場】等港股回一回氣 唔使心急追貨 (上) 

勝利瑞柏基金管理合伙人暨投資總監陳建良指，美股依家的確係相當觀望，市場過去一段時間已經對特朗普上場後嘅政策作出唔同預測，美股喺2024年10月就特朗普當選炒咗一轉，依家外界就睇緊特朗普政策會唔會有副作用，同埋真係會執行。佢又話，美股跌得多又會彈返啲，升得多又會回套少少，反映觀望氣氛都幾濃，例如美國通脹問題，市場有時好驚，但有時又覺得唔使太擔心。 

KL估計，特朗普上任第1個月關稅政策就會出爐，但唔係「晒冷」一下子加60%關稅，應該係加少少，如果對方唔執行某啲嘢或開放市場，90日或180日後再加關稅，其實特朗普好鍾意估一樣嘢，就係睇準對方「最痛嗰點」質落去，對方如果覺得痛，佢就會叫對方讓步，特朗普就會縮手，變相係佢冇做過乜嘢已有收穫，呢個係佢嘅慣技。

【名家給力場】特朗普唔會「晒冷式」推關稅因為... (上)

勝利瑞柏基金管理合伙人暨投資總監陳建良估計，中央將因應農曆新年期間整體消費，以及春節假後復工數據做部署，若消費數據向好，就唔需要推咁多刺激政策，反之亦然，所以的確會進入一個相對冇討談空間嘅時間。 

KL續指，估計恒指明年較大機會呈橫行格局，但同過往慢慢飄落去嘅橫行唔同，因為外資唔會喺經濟啱啱復甦後，就即刻投資港股及A股，所以佢認為港股明年唔會升好多，但亦唔會出現資金大舉流走或沽空嘅情況。 

佢又預期，港股明年板塊輪動會幾明顯，唔同板塊會輪流炒上，而且係短線升完一浸就跌，所以較難捕捉政策市反彈，佢建議投資者明年僅適量參與，唔好太進取。 

【名家給力場】恒指2025年料橫行 散戶唔好太勇(上) 

勝利瑞柏基金管理合伙人暨投資總監陳建良指，內地首次舉行發布會係想表示國家會支持醫療板塊，令市民能夠買到新生物製藥。此外，醫保局亦容許新生物製藥適量加價。整體而言，國家希望令內地醫療水平上升，市民對未來嘅憂慮減少，從而帶動消費上升。 

KL續指，美國生物安全法案雖然禁止美國生物公司同中國企業合作，但歐洲一啲福利較為完善嘅國家，仍然需要靠中國生物製藥公司提供廉價藥物，因此，KL認為法案令美國藥廠成本提高，最終係損害緊美國，相反對內地其實係有利。