跌市中的5個建議
大家好，又係我漁米家😄
咁耐冇同大家見面，今年大家過得如何？如果覺得唔好嘅，其實唔好太介懷，市場其實永遠都係好似一個小朋友咁，時不時就會發吓脾氣，相信今年每一個投資者都唔會容易過，甚至有基金經理話比死更難受！
要成為一個出色嘅投資者，必須要走過牛熊周期。如果你好似我一樣已經是視投資為一個長遠嘅個人事業，無論你依家輸定贏都唔需要諗太多，因為投資就有如跑馬拉松，唔會話贏咗頭100米就攞金牌。幾經艱辛最後攞金牌嘅情景，會於勵志電影情節中經常出現，相反現實中，長期戰鬥最後一鋪輸清袋嘅可能性反而會更常見。面對今時今日嘅劇烈波動市况，重點係檢討自己如何處理跌市，而唔係一味喺度諗自己點樣贏返。其實有時壯士斷臂，輸少當贏可能更好。更重要的是，多啲將重點放在不斷優化自己嘅交易計劃(trading plan)。
通常市好嘅時候，唔易壓力測試到你嘅trading plan 有咩漏洞，正所謂打風嘅時候就最清楚邊一個窗漏水！見漏水就係時候要修補啦，以下係歸納出對我來講比較緊要嘅5個大點，希望幫到大家思考：
1）建立Trading Journal 來了解自己嘅交易狀況，並重新認識自己！
我建議大家做每一個交易之前，最起碼寫低成個Trading Plan係啲咩，買入嘅原因係乜嘢，同埋未來目標賣出嘅scenarios，之後先有得做檢討。好多時候我哋連續輸幾鋪嘅時候（一定會有機會發生），一本Trading Journal記錄低自己交易嘅狀況，同埋一啲每日嘅心路歷程，日後再回望其實對自己未來嘅交易路上一定有幫助。始終投資炒股有50%以上係心理因素，每一次嘅交易或多或少都會受到情緒影響，投資者亦常常活於貪婪同恐懼之間。留個記錄嘅重要性係，將來你能夠可以用一個第三者嘅角度，重新觀察自己當時嘅情緒。某程度上好多交易決定都係違反人性，其實每次交易都係一個好嘅機會重新了解自己、認識自己，自己嘅性格亦都好容易反映喺你嘅交易入面，例如我嘅性格傾向比較樂觀，但問題係樂觀就會危機意識唔夠強，所以我就要經常同自己講what if I am wrong ? 其實係冇絕對嘅中立，但係令自己盡量做到持平嘅態度，現在long 以外，我也會多考慮short，主要係因為盡量想平衡自己，觀察市場嘅時候，唔好又一面倒向好偏差(bullish biased)。
2）持之以恆地觀察市場
經常都聽到「唔買都埋嚟睇下」，覺得呢一點係特別重要，基本上我每日都睇市，我覺得炒股票同做一個其他嘅專業係冇分別。重點都係認識市場嘅運作，漁夫呢個系統其實有埋訊號，已經好幫到大家好簡單地大約了解市場發生緊啲咩事，就算我唔買，其實我都會去研究吓嗰隻股票，及其板塊的能量升跌，有咩 catalyst 令佢升，每一次嘅研究其實就好似練習基本功，慢慢修練增加功力，最後變成自己嘅competitive edge 。相比起機構投資者，作為個人投資者我哋嘅競爭優勢已經比以前好咗好多，可以有系統幫手亦都有好多網上嘅資料，甚至乎有啲人已經幫你做埋一啲基本分析。
3）建立你嘅交易風格
最近金Sir陳建良(KL) 做了一個價值投資課程，我強烈建議大家重溫再重溫，呢個應該係我近年少見極有質素嘅討論課程，不過我估好多投資經驗尚淺嘅人，會有啲聽到一頭霧水。但係如果你已經對投資門派有一定認知，一定會聽到津津有味。 近年比較盛行Mark Minervini 的VCP 選股法，我個人都有身體力行作出過一啲實踐，我覺得市況較佳嘅時候，仍然係一個唔錯嘅交易方法，可以好短時間，帶來一個唔錯嘅回報，但係呢個方法嘅弊端，就係要好考Time the Market 功夫，另外我覺得呢個方法喺香港市場會比較難實踐，主要原因可能係市場深度、企業質素及行業多元性問題。價值投資嘅安全邊際對一般反應慢嘅散戶來講，有時可能效益會比較大，但係對要求你基本分析嘅能力較高，如果好似我咁，根本唔係金融界別出身，我哋唔會喺選股有太大優勢。因此，我就開始研究如何在技術分析及基本分析中間找出路，日子久了，變成了我的個人風格。選股的時候，我用加分減分的概念，綜合兩方面嘅分析，篩選我認為有潛力嘅股票。 投資嘅時候，亦都開始唔會太局限自己喺某一個門派，開始認清投資在同時間換框思考。
4）認清你嘅投資 timeframe
交易timeframe 其實也可因應市況作出調整，我自己有一個理論，「市場總有人需要開飯」。基於呢一個市場理論，我會開始多思考究竟邊一批資金主導緊市場，唔同嘅操盤手，佢哋喺呢個timeframe ，究竟諗緊啲咩。例如最近市場volatility好高 ，其實係對於day trader 極為有利，但同時對swing trader 極為不利。至於中長線資金，亦都只會考慮趁低吸納，絕對唔會追價。除非day trade 或者打超短線博反彈呢種 timeframe ，swing trade 最好就唔好考慮。做中長線資金，亦都多考慮低吸價值股就算。喺呢到只係想俾大家做一個參考，所謂嘅換框，亦可以用「投資timeframe換框」概念。有時亦都可以去諗，咁短timeframe 其實並不適合自己，直頭於高波幅市忍手唔做任何交易。
5）控制資金敞口（Exposure )
Exposure 永遠都係最重要既一環，亦都係最被忽略嘅一部份，差唔多每一個投資老手，經常都掛喺口邊正正就係progressive exposure 。我在二月尾眼見好多股票都開始over-extended ，當時港股仲要跑贏美股，已經有一種不祥嘅預感，雖然我都有手多多，但係因為我有一路沿途減倉，所以並未有因為今次市場「突然逆轉」有太大嘅損傷，再一次印證progressive exposure 嘅重要性。甚至增加了唔少現金，可以喺市場最恐慌嘅當日買入股票！所以如有懷疑，減低資金敞口風險，增持現金永遠都係一個好嘅決定，如果好似莊博咁叻，做定tail hedging 作保護及轉用長短倉策略，效果可能更為理想。不過當然，仍然都會覺得冇咩投資經驗嘅朋友，第一步學識先增持現金，其實都係一個未嘗不可嘅做法。
你還熱愛投資嗎？
熊市嘅時候，其實都係一個幾好嘅機會，測試你對投資呢件事有幾熱愛，如果經歷咗今次嘅大跌市，仍然能夠持之以恆咁繼續睇市，繼續研究股票，我有信心你哋一樣能夠在市場站得住腳。在這亂世入邊，我地要感恩有莊博士和KL及其他漁民繼續陪伴住我哋，走過每一個投資道路 ，祝大家今年身體健康、投資順利！
如果大家想跟漁米家及其他師兄師姐學習，就要睇吓「漁民系列」文章：
文章分享
重要聲明：股市漁夫內的所有內容，包括本影片，絕不構成任何投資意見或購買任何股票及金融產品的特定推薦意見及/或不構成任何游說或要約，以購買、出售或以其他方式交易任何證券、期貨、期權或其他金融工具或其他產品，漁夫系統的內容亦並非就任何個別投資者的特定投資目標、財務狀況及個別需要而編製。投資者不應只按漁夫系統的內容進行投資。用戶必須留意，漁夫系統的所有訊號，並非是買賣訊號或任何投資建議，而所有訊號均是全自動用第三方提供之客觀市場數據計算出來的結果，當中並不涉及任何人為的想法、修改、修訂或任何投資建議。本網站包含的所有內容、資訊、訊號，並不針對任何特定的投資目標、財務狀況以及可能使用或接收該內容的特定人員的特定需求。在作出任何投資決定前，投資者應考慮各種金融產品的個別特點、個人的投資目標、可承受的風險程度及其他因素，並適當地尋求獨立的財務及專業意見。
詳情請重溫股市漁夫FAQ及免責聲明。
最後更新： 2022-04-07
