「股市漁夫」創辦人莊志雄指，噚晚債息冇大反應係好事，其實近期債息都比較穩定，所以之前影響股市表現嘅情況冇再出現。睇返美銀嘅調查，可能係股票價值升咗，債券價值跌，此消彼長下，私銀客戶持有股票比重去到2005年以來高位，達63.6%，值得留意係，2015年呢個比重係62.5%，當年係一個上落市，暫時睇嚟同今季情況差唔多。

Lewis又話，過往如果去到咁滿倉係要小心啲，起碼唔好再加倉，賺緊錢一定繼續持貨，美銀嘅調查話依家係牛市末期，其實係比較奇怪，因為依家先開始復甦，未見過啱啱復甦就係牛市末期，而基金經理持倉又咁滿，相信原因係...

「股市漁夫」創辦人莊志雄指，由於Facebook、Alphabet、微軟創新高，帶動標指破頂，雖然納指冇創新高，但今年以嚟仲係有升幅，不過，由於之前好多炒得好顛嘅股份，尤其未有盈利嗰啲，其實呢類股票已經屬於「泡沫爆破」，例如「契媽股」。佢又話，其實少咗股份參與今輪升市，亦睇到市寬係背馳，標指係向上，因為大市值股造好，但整體大市係愈來愈多股份跌穿50天線，剩返約一半股份喺50天線樓上。

Lewis估計，市寬會喺現水平上落，強勢股會hold得好啲，但弱勢股彈完之後應該冇力再升，市寬要上返高位亦比較難，因為有好多蟹貨，相信第二季都會係呢個狀態，即指數可能再創新高，但之前炒得最顛嘅股份，最叻都只係打橫行。

「股市漁夫」創辦人莊志雄指，債息升唔多唔少受國債拍賣反應麻麻影響，嚟緊要留意3月11日，因為會拍賣10年期國債，同埋個額都唔細。佢又話，股市噚日反彈，同通脹預期有少少炒過龍有關，債息抽穿1.5厘後，股市就開始調整，主要集中喺增長股、科技股，調整幅度都比較深，但如果用5年期及30年期打和利率去做一個比較，會睇到息差去到正數，反映市場對通脹預期非常高。

Lewis又話，短線突然抽到咁高有啲過咗龍，長遠通脹係會升，繼而影響利率，但短期利率未必需要抽到咁高，所以通脹預期係過咗火。佢又指，近期多咗人做短倉，有一班專業投資者專睇個趨勢再落注，呢班人叫CTA，依家環球成熟市場債券淡倉水平係10年以嚟最低水平，反映可能造淡造到過咗龍，如果國債拍賣理想，可能會挾一挾淡倉。