大家好🙋🏻♂️，我係漁米家😁
上年因為疫情嘅關係，多咗時間可以研究投資。雖然參與買賣股票已有一段時間，但係認真去學習點樣穩定地獲利，都只係呢一年半載嘅時間，所以唔算係乜嘢老手經驗分享。不過，這絕對係我實實在在操作過好多唔同股票之後嘅實戰經驗，今次好高興有機會同大家分享，亦都借機總結喺呢段時間學識嘅嘢。
我呢一年其實都去睇過及學過好多唔同嘅方法，而對我影響比較深嘅絕對要數到「股市漁夫」及Mark Minervini（米Sir）。上年底因為COVID-19嘅關係， 米Sir首次Online去做Master Trader Program，我有幸同世界各地50個唔同國家嘅人一齊上呢一個Online Course，仲有機會有一日全日嘅時間跟佢一齊做live trading。
首先，我都仲算係年輕，仲有工作能力及可以承受嘅風險比較高（唔代表我罔顧風險，風險仍係我first priority )，所以我冇分散投資做ABCDE餐，我定位自己係一個交易員/股票基金經理去管理自己嘅組合。「股市漁夫」對我來說係一個好重要嘅工具，就好似籃球員必須要有一對好嘅籃球鞋一樣，而且莊博嘅每周會員「市場氣候」節目，已經足夠補足我宏觀經濟形勢的看法，所以基本上我唔會再睇其他財經新聞，甚至乎我係會刻意避開去睇新聞，因為對於我來講市場投資產品嘅價格變動，同埋成交量就已經係最重要嘅一手資訊。我相信我從來都不比市場聰明，所以我所做嘅嘢只係觀察市場嘅變化，並作出適當的反應。
首先，投資前一般人多數會第一時間去諗可以賺到幾多錢，但原來為自己定立一個明確嘅交易系統，同埋交易原則，來應付唔同嘅市況先係最重要的。做好成個交易系統同埋交易原則，其實錢係會自自然然嚟。累積越多嘅交易亦都對你往後再重新檢討，及改善交易系統及交易原則，會起到好大作用。我都建議初學者係可以用一個比較細嘅倉去開始試，我自己大概有80%既交易系統策略及方法係源自於Mark Minervini。
好多人一聽到米Sir， 就淨係諗起佢講VCP買入法，但係其實我自己覺得買入法只係佢成個交易系統嘅10-15%甚至更少，一個好嘅交易策略／系統係要具備：
1）良好的選股方法
2）買入方法/時機
3）設置低風險止損
4）加減倉及倉位處理
5）賣出方法/時機
6）實質交易操作
7）定時檢討
仲有定一啲交易原則俾自己都好重要，例如我有一個原則，就係當我連續輸三個Trade ，我下一次開倉就只容許落一半或1/4 注碼，如果再輸就要停止交易一星期。呢啲咁簡單嘅交易原則，喺重要關頭，當自己感到迷失嘅時候，會變得好有用。例如上年9-11月，此原則禁止我再冒進，對本金起到保護作用！其實當時正正就係有部份股票經歷深度回調，同埋我當時選股方面仍有不足之處，一不留神就經常追入咗落後股，而唔係專注龍頭領袖股。
再講下選股嘅方法，我係會就住米Sir所講嘅方向去搵處於Stage 2 上升趨勢中嘅股票，然後建立一個強勢股名單，呢一個名單係非常之重要，每星期我都會做一次檢討，望一望有冇一啲股份要剔除或者要加入。我認為呢一個觀察名單比睇恒生指數更重要，佢能夠代表市場嘅機會所在，因為如果呢啲強勢股有咩頭暈身㷫，個市通常都唔方會好得去邊，當然留意市寬指標亦都好有用，不過我自己覺得都唔夠呢張清單直接。用強勢股watchlist去測市呢個方法其實並唔係想像中咁難。強勢股watchlist入邊一定會有幾隻表現出色嘅股票，當大市升時佢大升，但大市跌嘅時候佢都會繼續升，仲係經常都係穩定地升，回調亦都好細，買咗呢類股票就咩都唔使做，安心坐直至到股票轉弱，正式就係賭俠所講嘅「悶悶哋咁贏」🤣
近排擔當牛市領頭羊既例子有信達生物、中國有贊、阜博、微盟、同埋藥明生物。如果呢啲股份突然逆轉，例如平時唔會有嘅大陰燭，仲要係幾隻強勢股一齊出現大陰燭，咁就要非常小心，可能大市要深度調整，甚至代表牛市已經終結。
另外，單一強勢板塊內股份齊升齊跌5%係好平常，但若是多個強勢板塊一齊跌，咁就要非常小心，並留意持股是否已經跌穿stop-loss /止賺位。用呢種「stop/止」機制根本唔需要去主動減倉，因為一早Set好嘅止賺止損已經幫你減咗倉，隨住市況轉差便自動降低風險。除非你冇紀律，當刻跟住羊太FOMO，亂衝亂撞即日再開返倉，咁就冇辦法啦。
以上嘅做法連諗幾時去減倉嘅心機都慳返，剛剛呢一次回調，「Stop/止」就正正係自動幫我增持咗30%現金。至於一見指數去到「高位」就清倉離場，係一種單邊睇淡睇好嘅做法，屬於非常危險嘅行為，萬一估錯方向隨時會俾人左一巴、右一巴。
選股我通常會用漁夫系統嘅「風中勁草」，因為超強勢股票一定能夠時時喺風中勁草出現。留意建立強勢股名單嘅時候唔代表要立即去買嗰隻股票，但係我一定會去了解一吓佢，同睇吓係咪要放入觀察名單。跟住就係要知道板塊係咪強勢，要了解呢一樣嘢並唔難，click入板塊望望多唔多突破股，同埋”20天能量”多唔多高能量股票就即刻知道。如果有一隻股票在板塊中係第一隻出現嘅突破股或者有好多隻股票差不多時間突破，我就會多加留意新嘅趨勢是否在這個板塊形成，留意吓有冇啲股票係呢個板塊之後突破或者能量提升。
選股方面另外一個大原則係我基本上係只會選板塊中頭三至四隻領袖股（或20日能量計最高的），作為我可能會交易嘅對象，並把它們加入觀察名單，但有時極之強勢板塊就例外，會加入多幾隻。另外，一啲特別嘅板塊，例如科技板塊同醫藥板塊，由於公司業務可以好唔同，基本因素亦大不同，咁就唔一定只選頭幾位嘅股票，要酌情處理。周期性板塊處理就會有啲唔同，因為一般來講，周期性板塊好少會有長期牛市，但近排周期性上升嘅銅、鐵、紙類股份都大幅上升。
選股係要好好琢磨，如果第一步選股已經出問題，就會好似一座高樓嘅地基未打好咁，導致之後冇法做到穩定地、持續地跑贏市場嘅交易。另外，可以參考52週新高數據，因為處於Stage 2 嘅股票係會有能力創新高。另外，要入我的觀察名單，價格要高於$1或者成交額大過一千萬。
建立一個股票觀察名單係重中之重，因為我哋要訓練自己對眼經常望住市場上面最靚嘅嘢，而唔係一啲核突股票🤮。如果有啲股票會令你產生一種感覺，問自己點解之前睇漏眼，好想一早擁有佢，咁反而係好事，因為你個股票清單就真係一個強勢股名單。我現在追蹤嘅股票唔多過200隻，真係會出手交易嘅可能係50-80隻，至今有大約65隻係交過手嘅。
至於個股基本分析，其實我只會考慮三大項目：
1）EPS增長
2）銷售增長
3）毛利率增長
之後最多都係睇埋現金流、負債比率，如果最近一季半年增長有加速又會加分。
好多時都見到有啲股票，根本上就冇盈利（例如醫藥股），甚至板塊內大部份公司業績都係虧損嘅，我覺得最重要反而係要知道背後乜嘢故事推動佢嘅股價，甚至乎無新聞而股價先行，可能更理想。我自己嘅believe係，我係一個趨勢投資者，而唔係一個去計valuation 嘅分析員，我只相信趨勢，趨勢一旦完結我就離場。 （待續）
重要聲明：股市漁夫內的所有內容，包括本影片，絕不構成任何投資意見或購買任何股票及金融產品的特定推薦意見及/或不構成任何游說或要約，以購買、出售或以其他方式交易任何證券、期貨、期權或其他金融工具或其他產品，漁夫系統的內容亦並非就任何個別投資者的特定投資目標、財務狀況及個別需要而編製。投資者不應只按漁夫系統的內容進行投資。用戶必須留意，漁夫系統的所有訊號，並非是買賣訊號或任何投資建議，而所有訊號均是全自動用第三方提供之客觀市場數據計算出來的結果，當中並不涉及任何人為的想法、修改、修訂或任何投資建議。本網站包含的所有內容、資訊、訊號，並不針對任何特定的投資目標、財務狀況以及可能使用或接收該內容的特定人員的特定需求。在作出任何投資決定前，投資者應考慮各種金融產品的個別特點、個人的投資目標、可承受的風險程度及其他因素，並適當地尋求獨立的財務及專業意見。
詳情請重溫股市漁夫FAQ及免責聲明。
最後更新： 2021-02-07
