- 2021-12-19
- 免費文章, 會員文章, 漁民系列
- 股市漁夫選股器,股市漁夫,選股器,股海漁夫評價,股市漁夫系統好唔好,股市漁夫好唔好
大家好，我係漁景灣，好耐冇見。趁着2021年尾，做少少記錄，總結一下用「股市漁夫」選股器的操作心得。
筆者自己好少用一年去做統計，因為投資係要個個星期都review，所以唔識答。總之個倉仍然靚靚囝囝，有問題嘅股票一早換走，唔會等到年尾，如果買完嘅嘢搞到自己瞓唔到覺，就Sell down to the sleeping point！
雖然我一向都港女、美女左擁右抱，不過港女在世人唾棄的時候，才開始展現其亞洲小姐亮麗的一面。以下是一些例子⋯⋯
首先講吓中國建築(03311)，記得8-9月時好幾隻建築股出咗「破」訊號，而中國建築係其中一隻最早出訊號嘅板塊領袖股，不過我都係觀察咗一輪先買，係差唔多出施政報告前，嗰陣時仲吹緊少少北部都會區。我諗用系統最難接受嘅係，有時出訊號嘅領袖股，佢並不一定係行業最大市值嘅龍頭，甚至可能係市值相對細嘅公司，呢一點我都花咗啲時間先領略到。
另一隻係比亞迪(01211)，呢隻熱門股唔使講太多啦，自從睇到佢電池出咗嚟之後，真係有同寧德時代拍得住嘅潛能，再加埋生產同銷售數字都靚仔，估計未來需求龐大。過去幾個月已經升咗5成，不過依家已經跌穿九月高位，所以即刻落車。
咁又唔好講到港女係女神咁樣，有一兩隻股票，自己都有研究過基本面，係正嘅，但係技術上炒咗粉就係炒咗粉，好似隻阜博(03738) ，做侵權辨識相關嘅產業，百幾億市值合唔合理？睇吓佢侵權收費嗰啲相關資料，我認為3738係世界第一，自己做下功課，再交流下。
咁美女有乜好砌？
好老實，啱啱呢排冇乜，久唔久玩下啲超級大龍頭股嘅波幅，好似乜鬼GOOGL, AMZN, ASML, NVDA, TSLA,大佬呀，佢哋有超級勁嘅護城河或者壟斷地位，就算真係死，都係因為市場氣氛，多過個基本面（TSLA唔計啦。。。因為佢好大嘅溢價係來自個Elon神，希望佢身體健康🙏🙏🙏）
又有玩過下啲黃金，白銀，農產品ETF DBA，真係買少少long call算啦，結果係乜都食唔到。
咁到底應該繼續roll落去？定係放棄？呢個睇吓自己點樣配置PLAN ABCDE。
變通很重要
李小龍都話，如水一般在流動，就是最好的狀態。練習基本功，亦是跟川流不息的道理息息相關。有一些基本功或者信念，是自己擁有的。然而，市場口味或者風氣並不為我們等漁民所控制。
舉一個例， FOMC開會前前後後，就算你睇返漁夫群組，嗰陣時都有提出過通脹同埋滯脹。但真係好癲，記得有一次post話炒緊滯脹，商品升緊，然之後過一個星期左右，個市場口味又變返通脹。
結論，可以跟車太貼(我覺得高追係ok,但要知自己頂唔頂得順同埋有冇紀律)，記得見唔對路，一係剎車，一係落車。道理就好似，如果反彈，輸緊嘅股票應該係輸住咁樣先走，唔係希望升返去打和價，因為機會率係近乎零，除非個市你嗰期行運。記住下面呢個表，一旦輸超過8%，就好難追！標普500指數嘅長期年回報率都係8%，試問一個普通散戶，又點可以假設自己長期跑贏指數？
見到藍天，不妨多點憧憬。藍天藍得太過分，就要想一想後面會否是一片黑暗，自己搵返船長幅夕陽無限好圖，個比喻幾好。
贏得穩，輸得起，多變通。
下面舉兩隻股票例子，去做一個總結。
小弟有JD, 用香港報價去講， $340入過， $300入過，$270都入過，最勁近排去返$350 ，跟住就走鬼，一嘢車返落去穿150天線，美股系統仲出埋Stop添。通常如果最高位或者短期高位跌返落嚟，如果估值有修正，都會落返去一個區間慢慢走，不妨喺嗰啲位得閒就低買高賣，少少無妨，又可以熟習下股票嘅波幅。呢隻都係一個好例子，引證漁夫係主要用動能交易，但係如果你見到啲靚嘢，又有未來，你係可以唔使留意太多突破訊號，當然能量都係一個好好嘅參考指標。記住，系統指標係死嘅，我哋係有得揀自己點樣操作。
另一只招商局港口(00144)亦係一個好例子。
筆者諗咗獵殺遊戲好耐，你一係就期待會有獵殺的一刻，一係就覺得呢件事唔會發生係你呢隻股票身上，然後計好條數喺移動平均線上面買。但最後佢點樣行，你真係唔知，唯有多啲祈禱。
老老實實，我就做得一般。價值股勝在有價值，但係真係慢到飛起，呢個好睇你自己耐性，同埋嗰期等唔等舊錢洗。我就衰急性子，冇耐性，同埋冇conviction😅
大概八月尾，$12.4買。嗰陣仲好胸有成竹，買咗4000股，心諗，最壞嘅情況咪去到$10 ，都係輸住$8800 ， OK啦。誰不知去到12月1日，嗰日殺到最低係大概11.9。你唔好睇1號之後嗰幾支大陽燭，明明計好晒數，但係嗰陣時幅圖真係好樣衰，覺得$11.9走咗佢算啦，好大機會去到$10。點知，真係獵殺。。。
好彩有中通服，希望唔會變做終通伏 ，其實佢都叫獵殺過。。。
祝願大家有個愉快聖誕，及一個美好的2022 ，身體健康。
重要聲明：股市漁夫內的所有內容，包括本影片，絕不構成任何投資意見或購買任何股票及金融產品的特定推薦意見及/或不構成任何游說或要約，以購買、出售或以其他方式交易任何證券、期貨、期權或其他金融工具或其他產品，漁夫系統的內容亦並非就任何個別投資者的特定投資目標、財務狀況及個別需要而編製。投資者不應只按漁夫系統的內容進行投資。用戶必須留意，漁夫系統的所有訊號，並非是買賣訊號或任何投資建議，而所有訊號均是全自動用第三方提供之客觀市場數據計算出來的結果，當中並不涉及任何人為的想法、修改、修訂或任何投資建議。本網站包含的所有內容、資訊、訊號，並不針對任何特定的投資目標、財務狀況以及可能使用或接收該內容的特定人員的特定需求。在作出任何投資決定前，投資者應考慮各種金融產品的個別特點、個人的投資目標、可承受的風險程度及其他因素，並適當地尋求獨立的財務及專業意見。
詳情請重溫股市漁夫FAQ及免責聲明。
最後更新： 2021-12-19
